O Forum Gastronómico da Coruña leva anos gañando referencialidade no sector e acollendo novas e chamativas propostas de diferentes expositores. Equip’ Hotel, unha empresa dedica ao equipamento para restauración e hostelaría, quixo presentarse en 2019 dun xeito diferente, profesional e fresco, destacándose do resto de stands da feira. O obxectivo: promocionar a súa marca no sector e gañar visibilidade.

O proxecto empregou un grande escaparate a base da cor corporativa, cun fondo monocromático que permitía centrar toda a atención no produto que comercializa a empresa. Realizouse o deseño completo da estrutura, o estudo lumínico que se resolveu con luminarias de foco en carril, e unha proposta de mobiliario pensada para que este pasase o máis inadvertido posible, dado que a súa función era simplemente de soporte expositivo.

Completouse o traballo cun proxecto de escaparatismo adaptado á situación, con colocación estratéxica do produto (louza, cristalaría, cubertos, atrezzo…) a partir dun estudo previo que permitiu unha composición que destacaba pola súa harmonía.

O resultado foi unha posta en escena que non pasou desapercibida por ningunha das persoas que visitaron o Forum.