fbpx

O Refuxio

Estado previo

O proxecto

O Refuxio é un negocio familiar que vai xa pola súa terceira xeración. Fundado como taberna, a seiba nova reconverteuno en restaurante para aproveitar os valores da cociña tradicional típica da zona.

A localización nunha contorna natural, a casa, catalogada como da década de 1960, e a filosofía de traballo da familia levounos a deseñar unha intervención limitada a actualizar un pasado que ten aínda moito percorrido. O obxectivo era manter o ambiente de taberna para tomar uns viños, e que o restaurante mostrase no seu ambiente a sinxeleza que se adiviña en cada prato.

Por outra parte, o Refuxio sufrira xa algunhas reformas anteriores, que deixaban unha imaxe incoherente co que se trataba de transmitir e unha distribución que propuña un percorrido interior caótico e pouco práctico.

Xa que logo, optouse por un redeseño do interior e do propio branding do negocio, atendendo aos seguintes aspectos con especial coidado. Primeiro: recuperar os valores da arquitectura daquel tempo, adaptándose ás características exixidas pola Guía de Cor de Materiais de Galicia. Segundo: representar a sinxeleza, elegancia e calidade do servizo que ofrece, tendo particular coidado de transmitir referencias da localización privilexiada onde se encontra. Terceiro: optar por unha estética popular a base de empregar materiais de proximidade, dentro da nosa filosofía km 0. Isto é: granito de Santiago procedente dunha canteira da zona, carpintaría e outros elementos fabricados por man de obra local, etc. Cuarto: conseguir un deseño atemporal e optar por materiais imperecedoiros e de doado mantemento. Quinto: redistribuir os ambientes para poder ampliar os usos. Neste caso alargáronse as zonas dedicadas a comedor e, a maiores, creáronse espazos para situar un punto de venda de produtos de elaboración propia, un comedor para grandes eventos, e unha zona de pub para as noites do fin de semana. O resto do espazo foi completamente redistribuído para que o fluxo de movementos da clientela fose mais harmónico e intuitivo. E, sobre todo, máis cómodo.

O resultado foi un proxecto no que conseguimos preservar a esencia e o encanto das vellas tabernas de aldea, transferindo todo o protagonismo aos materiais. Singularmente á «pedra de Santiago», que ofrece ambientes sinxelos e elegantes e favorece a fusión con outros elementos tradicionais.

Ademais, aumentouse a cabida de clientela, facendo que os espazos resultasen máis polivalentes e admitisen diferentes configuracións de mobiliario, segundo as necesidades do momento. Canto á fachada, recuperamos todos os detalles decorativos propios deste tipo de construcións, como ornamentos, corpos voados e zócalos, e todo isto creando un marco para situar a nova imaxe corporativa, deseñada baixo os mesmos principios.

Planos

Cando queres comezar?

Reserva xa a primeira reunión de traballo para que avaliemos conxuntamente o teu caso. E, se tes un negocio, non marches sen descargares o teu workbook!

Cando queres comezar?

Reserva xa a primeira reunión de traballo para que avaliemos conxuntamente o teu caso. E, se tes un negocio, non marches sen descargares o teu workbook!