Luciana e Juliano, propietarios deste restaurante xaponés querían arranxar o frontal da cociña, que daba a un corredor de acceso ao comedor e aos aseos.

O local do Kyoto, porén, herdara a estrutura doutro negocio de restauración anterior, e facíase necesario unha reforma que unificase os diferentes espazos, tanto a nivel estético como funcional. Finalmente, o proxecto estendeuse por medio local, aínda que executado por partes. Deste modo, actuamos primeiro sobre a fachada e a parte frontal, incluíndo a zona de barras e o corredor — co frontal da cociña — e mais tarde sobre o comedor principal, ao fondo.

Para o deseño tivemos en conta certos materiais precedentes e evitamos cambios de estrutura que encarecerían o proxecto. Unha revisión de elementos decorativos permitiu unificar todo o local, reinterpretando os interiores tradicionais xaponeses por medio de listóns de madeira que se repiten e se organizan de maneira diferente segundo a súa función.

Tamén se mellorou consistentemente a iluminación das barras, cuns plafóns luminosos co mesmo tratamento estético de enreixado xaponés. Do que se trataba era de dar luz suficiente ás zonas de traballo, singularmente á barra de sushi, sen alterar a iluminación máis tenue do resto do local. O conxunto combinouse con mobiliario de estantería sinxela que non interfire na luz.

Na fachada revisouse a marca gráfica, realizando un rótulo retroiluminado integrado na parrilla de listóns de madeira que tamén se repiten ao interior como patrón.

O resultado é un espazo compacto, que emprega tamén a pintura monocromática para dar maior unidade tanto dentro como fora, e que aproveita todos os elementos posibles para lograr un ambiente de referencias xaponesas sutís e, á vez, atemporais.