Asian Street Food – Take Away é un novo servizo de comida para levar, instalado na cidade de Pontevedra baixo a premisa de traer a esta cidade galega todo o sabor e a cultura culinaria de rúa da rexión chinesa de Cantón. Fusiónanse, polo tanto, a tradición gastronómica e a tendencia de consumo street food e take away.

 O obxectivo non é outro que satisfacer unha necesidade que ata hai uns anos podía ser inédita neste recuncho de Europa, salvo nas grandes cidades, pero que é hoxe cada vez máis común. E facelo sen renunciar á calidade nin á evocación dos seus referentes asiáticos.

A idea base que ordena toda a investigación, tanto para o branding como para o interiorismo, redúcese a «presentar», en lugar de «representar». Non se busca un interiorismo nin unha marca tradicional, nin autorreferencial, nin autoevidente.

A simplicidade propositada do deseño vai da man cunha oferta que se reclama igualmente sinxela: un produto gastronómico deseñado para levar, sen máis pretensión que reivindicar o sabor dos seus ingredientes e o saber facer da súa elaboración.

En consecuencia, o interioriorismo céntrase en resultar áxil para a venda, tendo en conta que a comida non se gozará no local e deseñando un fluxo de movementos unidireccional e concentrado. Óptase, en consecuencia, por unha iluminación sen estridencias, o uso da madeira como solución de calidez, unha exposición de produto ordenada e por dar relevancia á presentación de información, a través de cartelería visible a distancia que destaca e ordena a súa oferta a partir dos tres sabores basilares da carta: o pato, o porco e o polo.

Ao exterior, o local mostrarase como un gran escaparate que permite visualizar o produto desde unha rúa que foi transformada e peonalizada recentemente. O uso do logotipo ao exterior, á altura da vista, e un rótulo iluminado que capta a atención alíanse para potenciar a visibilidade do negocio.

 Nunha aposta por un interiorismo responsable, resultado de apostar por un deseño rendible, sostible e xenuíno, tivéronse en conta ao longo de todo o proceso creativo tanto as limitacións orzamentarias como a presenza de elementos herdados do anterior negocio que ocupaba este local.

En consecuencia, apostouse por recuperar case a totalidade destes elementos preexistentes (deseño sostible), limitando a intervención a unha serie de actuacións estratéxicas capaces de producir un forte impacto cun investimento mínimo (deseño xenuíno). Deste xeito, o reaproveitamento de elementos e a contención no gasto de execución, permitirán destinar recursos a desenvolver unha marca gráfica propia que identifique o negocio e o singularice (deseño rendible). Deste xeito, o interiorismo e o branding únense, baixo a premisa de simplicidade que se definiu previamente para este proxecto.