fbpx

10 teimas decorativas que deberías cambiar xa mesmo

Hoxe quero comentar dez prácticas que vexo a miúdo e que son capaces de arruinar un espazo que, en principio, queriamos mellorar.

Temas

Moi a miúdo, polo meu traballo, pídenme opinión sobre reformas e intervencións en espazos de todo tipo. Móstranme imaxes do antes e o despois para veren a miña reacción e teren así unha referencia profesional. Nestes casos, intento sempre ser sincera e comentar os puntos fortes e os puntos fracos do cambio. Tendo en conta que o que me mostran non é unha obra profesional, dun estudio, senón o que esas persoas fixeron pola súa conta, segundo puideron ou quixeron. Obviamente, respondo segundo o meu criterio, que non é unha verdade universal, pero si un criterio informado, creado a partir de anos de experiencia no sector. E, ademais, penso que iso é precisamente o que buscan cando me preguntan. 

Ás veces — máis veces das que me gustaría admitir —, os cambios que vexo nuns e outros proxectos parécense moito. Demasiado. É como se, para casos distintos, se aplicasen as mesmas receitas unha e outra vez. Xa falei noutras ocasións do tema das modas no interiorismo e de como creo que deixarse guiar por elas é un erro. Noutras palabras: demasiado a miúdo o espazo estaba mellor antes da reforma. Era máis xenuíno. Tiña máis carácter. Despois da reforma ten un aspecto máis moderno, é certo. Pero aquilo que o facía único desapareceu e a personalidade esfumouse. 

Así que hoxe quero comentar dez prácticas que vexo a miúdo e que son capaces de arruinar un espazo que, en principio, queriamos mellorar. Alá imos. 

1. Non aproveitar o que hai

Descartalo absolutamente todo dun espazo que imos intervir é un erro sempre. Os espazos teñen uns contextos. Localízanse en lugares concretos cunha historia propia. Non é o mesmo unha casa centenaria no campo que un apartamento do desenvolvismo dos anos 60. Cada un posúe características especiais que lle confiren unha atmosfera propia. E se conseguimos conservar materiais (pavimentos, azulexos, sanitarios, etc.) que xa non se producen, pero que talvez aínda están en perfecto estado, podemos preservar esa personalidade sen renunciar ao obxectivo da obra. 

Casa da pintora Ana Canas

2. Facer o que fai todo o mundo

Unha das constantes deste tipo de proxectos que me mostran é que se parecen moitísimo uns aos outros. As portas, todas con marcos prefabricados. Os chans, todos de tarima flotante. As paredes, todas brancas. Non está mal en si mesmo, pero o mundo do interiorismo é moito máis amplo e cando todos os proxectos conflúen nas mesmas receitas é que, probablemente, non se investigou moito.  

O resultado transmite pouco, é anodino, e non achega calidez (no caso dos nosos fogares) nin o espírito da marca (no caso dos negocios). Por iso sempre recomendo abstraerse das modas. Facer un esforzo por pechar as revistas de decoración e os sitios webs que che din o que leva este ano. 

3. Decorar a base de acumulación

Afrontémolo. Como sociedade, temos un comportamento consumista patolóxico. E iso trasládase moitas veces aos interiores, que se enchen de obxectos de todo tipo. Moitas veces producidos en masa, sen calidade estética nin material, que caducan rápido porque están deseñados para que así sexa e sigamos facendo virar a roda do consumo. 

Unha boa práctica é elixir ben os obxectos decorativos que imos usar, e apostar por elementos que se producen fóra das grandes cadeas de montaxe. Falo de artesanías, pero non só. Tamén hai obxectos de pequenas tiradas, ou elementos restaurados cunha segunda vida. Apostar por eses obxectos permitiranos transferir ao espazo cada unha das súas historias. 

Exemplo de acumulación de cousas e mensaxes con letras corpóreas

4. Obsesionarse coa combinación

Querer combinalo todo en base a unha ou dúas cores tampouco é bo plan. Facer que os mobles se conxunten coas cortinas, cos tecidos dun sofá ou con todo tipo de elementos empobrece o espectro de materiais, texturas e cores. Como sempre, hai moita marxe entre vivir nun cadro suprematista de Malevich ou nun mural de Diego Rivera. Non sei se me explico. 

O importante é entender que o uso da cor, como o das texturas e os materiais, debería responder a un motivo. Unha boa combinación de cores dá harmonía aos espazos e permite crear ambientes cómodos, que se adaptan ben á luminosidade do espazo e aos seus usos. O minismalismo ten grandes vantaxes. Pero a redución pola redución non leva a ningures. 

5. Decoración “de xénero”

Óuvese moito iso de que unha persoa vive nun espazo masculino ou nun espazo feminino. Ou que esta deseñadora ou este deseñador teñen un estilo masculino ou feminino. Sinceramente, non creo que exista un xénero en canto ao interiorismo. Non creo que deba existir. 

É un erro distinguir habitacións para nenos e para nenas, baseándonos no mito de que a cor define o xénero. Nunha sociedade cada vez máis aberta e comprometida coa igualdade, ninguén debería pertencer a unha cor. Noutras palabras, todo o mundo pode ser azul, púrpura ou maxenta. 

Bó exemplo de combinación de cores de “xénero”. Deseño tenda Zooco Studio.

6. Decoración con mensaxe

A que me refiro? A aqueles letreiros, letras en 3d, vinilos, etc., que estiveron tan de moda (e xa non o están) colocados nas paredes para lembrarnos algún tipo de mensaxe profunda que non deberiamos esquecer. Ao final, o espazo convertíase nun libro de autoaxuda, pero dos malos. Dos que caducan rápido. E a ninguén lle gusta vivir nun libro deses. 

Outra variante eran os letreiros, carteis ou pezas publicitarias noutros idiomas (xeralmente en inglés) que nos transportaban a outros lugares completamente alleos. 

Que non se me entenda mal. Non teño nada en contra de que alguén decore os seus espazos con cartelaría de pasta italiana ou unha silueta da cidade de Nova York se eses obxectos teñen algún significado para esas persoas. Pero a maioría das veces son só ruído visual, e ponse nas paredes porque era o que había na tenda, sen máis. 

7. O tema dos cadros

Hai un verdadeiro problema co tema dos cadros en moitos dos proxectos que me mostran. A miúdo eses cadros están aí soamente para encher o espazo, sen un obxectivo claro, sen unha temática concreta. Un cadro non achega nada se non é interesante, se non é valioso. E cando digo valioso non me refiro a un valor económico necesariamente. Un cadro valioso pode ser a acuarela que compraches a un artista de rúa nunha viaxe, e que che traerá recordos cando o vexas, ou unha fotografía do teu fillo. 

Tamén adoita haber un problema coa colocación dos cadros. Non hai por que colgalos sempre. Dependendo do espazo, os cadros tamén poden simplemente apoiarse. E en canto á agrupación, non hai por que aliñalos en todos os casos. Existen multitude de maneiras de colocar cadros, e valorar cada opción é o camiño para atopar a forma que dea verdadeiro valor ao noso espazo. 

Bó exemplo de como colocar cadros. How-to-Design-a-Small-Living-Size_Hero_Retouched

8. Iluminación excesiva

Outra tendencia equivocada, se non hai un estudo lumínico por medio, é a de multiplicar os puntos de luz. É certo que a cuestión da iluminación é complexa, porque hai que ter en conta multitude de variantes: altura, inclinación e cor dos teitos, cor das paredes e outras superficies de rebote, uso da estancia, etc. Non é o mesmo a iluminación dunha sala de traballo ou dunha oficina que a dunha tenda. E mesmo nas nosas casas, non debería ser igual a iluminación do noso dormitorio que a da sala de estar. E non me refiro só á temperatura da luz (máis cálida ou máis fría). Tamén é común colocar luminarias centradas en relación ao espazo, sen ter en conta onde se vai a necesitar maior achega lumínica en función dos usos. 

9. Rodapés

Recoñezo que me encanta investigar espazos realizados cando a profesión de interiorista non existía ou era, simplemente, ultraminoritaria. Falo de casas e locais de hai 40 anos. Na maioría de casos vexo unha enorme sensibilidade e harmonía colocando elementos diferentes. Hoxe, con todo, perdemos esa capacidade de combinación na maioría dos casos. Por iso tiramos do recurso fácil de igualar materiais. 

Isto é particularmente visible no caso dos rodapés. Forzámolos para que sexan do mesmo material e cor que o pavimento. Sobre todo en canto aos pavimentos cerámicos. Pero é realmente necesario? A verdade é que non. 

Ademais, no caso de rodapiés cerámicos, moitas veces son mesmo máis caros que o propio pavimento. O certo é que existen outras opcións, máis apropiadas e xeralmente máis baratas, como a madeira pintada. 

Bó exemplo, combinación de terrazzo con rodapé madeira

10. Un espazo, unha cor

Unha variante do punto 3 deste decálogo de erros é pintar cada espazo dunha cor, só por non repetirse, buscando combinacións que, ao final, son difíciles de encaixar. Ou a tendencia, que tamén existe, de pintar, nun mesmo espazo, dúas paredes dunha cor e as outras dúas doutro. 

Como sempre, a pauta aquí debería ser aplicar a cor de maneira racional. A cor dun espazo debe aplicarse tendo en conta os usos que se lle van a dar e o resto de elementos que van conformalo: iluminación, mobiliario, pavimentos, etc.

Se queres aplicar unha cor diferente nun punto, a miña recomendación é que primeiro pintes todo do mesma cor e, despois, en función destas variantes, apliques a cor puntual. 

Resumindo

A decoración é unha disciplina complexa, que vai moito alén de colocar obxectos a torto e a dereito para facer que un espazo sexa diferente do anterior. Necesitamos un estudo previo, capaz de responder estas tres preguntas:

Que é o que quero facer?

Cal é o obxectivo de colocar este elemento?

Este obxecto/cor/textura contribúe ao obxectivo ou vaise converter nun elemento anodino e sen valor?

Estas tres preguntas son unha excelente guía para non caer nas tentacións das modas que interiorizamos de revistas, programas e sitios web de decoración. Debemos entender a decoración como a fórmula para dotar aos nosos espazos de elementos que os humanicen e os fagan nosos, e non como un proceso de acumulación de trebellos que compramos sen saber moi ben por que. Isto é o máis importante de todo. É o teu espazo, así que decórao para ti, de maneira que teña sentido para ti, e non porque isto ou aquilo sexa tendencia. 

Share on facebook
Share on twitter
Share on linkedin
Share on whatsapp
Share on email

Se tes un negocio
ou estás a pensar en ter un,
isto vaiche encantar.

En decorazul levamos anos facendo interiorismo para empresas e, co tempo, detectamos un patrón de erros comúns que alongan innecesariamente os procesos e retrasan os resultados.

A boa noticia é que se pode corrixir. Para iso creei un workbook que te axudará paso a paso a definir o teu modelo de negocio e como presentalo ao mundo.

Asesoría gratuita
Solicitar asesoría gratuita
Decorazul
Si buscas conseguir el espacio de tus sueños en el que vivir mejor o en un negocio que atraiga clientes, estás en el lugar adecuado.
Hola, ¿en que te puedo ayudar?